الخشوع في الصلاة

عاوز أقول لك علي شوية تفاصيل تخليك تحب الصلاة ، وتوصل لدرجة الخشوع ،وتنتظم فيها لأنها هي الأساس اللي هتخلي مزاجك كويس ونفسيتك مطمئنه...

إمشِ بمبدأ أن صلاتك مش حاجة روتينية و مُجبَر تعملها..لأ بالعكس إنتَ بتكون رايح تقعد مع ربك شويه؛
و هتقعد معاه خمس دقائق بس فى كل فرض .. كتير على اللي أنعم عليك بكل حاجه؟
قبل كل فرض إستَعِد للصلاة و كأنك رايح تقابل حد بتحبه جداً..  
روح و أنت ملهوف .. ولو حد سألك رايح فين : قول رايح أقعد مع ربِّنا شوية .. خليه إحساس داخلي جواك ؛و أول ما ترفع إيدك وتقول : الله أكبر.. إبتسم ابتسامة مشتاق .. قولها وجواك صوت بيقول ( جيتلك يارب يا حبيبي ووقفت بين إيديك).. إنسى الدنيا كلها بمشاكلها و همومها فى اللحظة دى..
إقرأ الفاتحة بكل راحة واسمع جواب ربك بعد كل آية .. و متقولهاش بسرعة و كأن حد بيجرى وراك 💛..
و فى الاعتدال من الركوع لما تقول " سمِعَ اللهُ لِمَنْ حَمِدَه "
احمده أنت بطريقتك .. قول" الحمدلله يارب على كل النعم اللي اديتها لى" , " الحمدلله حمداً طيباً مباركاً،  كما ينبغي لجلال وجهك ولعظيم سلطانك " :

و أول ما توصل للسجود إفتكر إنهُ "أقرب ما يكون العبد لربِهِ وهو ساجِد" .. لما تهمس ببطن الأرض و بيسمعك من في السماء... سبِّحْ ربّك و ابدأ إحكي له كل اللى في قلبك .. قول يارب أنا بحبك .. (يارب خليك معايا فى المحنة دى) .. ( يارب أنا تائِه ، وجِّهنى للطريق الصحيح ) .. ( يارب أنا محتار فى الموضوع الفلانى .. ساعدنى ) .. إحكي وفضفض لإن محدش هيفهمك ولا هيحس بيك زى اللي خلقك
لما تحكي معاه ، مش هتلاقى حواجز بينك و بينه .. و احكي بالعامية مش لازم لغة عربية فُصحى يعنى 😁 .. هو أعلم بحالَك مِنك ، بس بيحب يسمع صوتك 💛.. يمكن تتلخبط فى كلامك ، بس هو فاهم إنت عاوز تقول إيه .. و صدقنى مهما كانت مشكلتك كبيرة وصعبة .. فى آخر كلامك هتحِّس براحة مش طبيعية و هتبتسم لأنك سلِّمت أمرك لرب العِباد ❤️💛
و بعد ما تخلص صلاة .. سلم عليه بس مش السلام التقليدي
لأنك دلوقتى بتسلم على حبيبك .. تخيل إنك بـ تقول ( هيوحشنى الكلام معاك يارب .. إمتى تيجي الصلاة الجاية علشان أرجع اقعد معاك تانى.. لسه فيه كلام كتير فى قلبي حابب احكيلك عنه ) 💛
صدقني أول ما تخلّص صلاة هتحس بعدها إنه مفيش حد قدَّك فى الدنيا.. مش تكبر وغرور؛ لكن راحة وطمأنينة ، لأنك كنت قاعد مع ربك .. مع حبيبك.. وسلمته أمرَك وتوكّلت عليه ؛ ولأنه لما تواجهك أي مشكلة فى يومك مش هتهز شعرة منك .. عارف ليه ؟! لأنك هتروح فى الصلاة اللي بعدها و تحكي لربك وتطلب منه يساعدك 💛
و يا بخت اللى يعرف معنى الوِصال مع رب العالمين .. ربنا يرزقنا و إياكم الثبات والخشوع فى الصلاة. 💛